“ ဦးဆန်းဆင့် သို့မဟုတ် ဂိုဏ်းဂဏ တိုက်ပွဲမှာ ကျဆုံးသူလား”
Sithu Aung Myint
ပြည်နယ်၊ တိုင်း လွှတ်တော် (၁၄) ခု ရှိတဲ့အနက် အရင် အာဏာရှင်တွေ ချမှတ်ပေးသွားတဲ့ လက်ညှိုးထောင် ခေါင်းညှိမ့်၊ အတည်ပြုစရာ လိုမှ လွှတ်တော်ခေါ် ဆိုတဲ့ လမ်းစဉ် မလိုက်နာပဲ လွှတ်တော် တကယ် အသက်ဝင်လာအောင် လုပ်ခဲ့တဲ့ တစ်ဦးတည်းသော လွှတ်တော် ဥက္ကဌ လည်းဖြစ်ခဲ့ပါတယ်။ ပြည်ခိုင်ဖြိုး ဖြစ်ပေမယ့် ဦးဆန်းဆင့်ကိုတော့ ဒေသခံတွေရော၊ လွှတ်တော်ထဲက အမတ်တွေကပါ ထောက်ခံကြပါတယ်။
“ ဦးဆန်းဆင့် သို့မဟုတ် ဂိုဏ်းဂဏ တိုက်ပွဲမှာ ကျဆုံးသူလား”
စည်သူအောင်မြင့်
မဇ္ဈိမ သတင်းစာ၊ ၂၃-၆-၁၄။ စာ-၉။
ဗုဒ္ဓဘာသာ သမိုင်းမှာ အရုပ်ဆိုး အကျည်းတန်တဲ့ ရန်ကုန်မြို့ မဟာသန္တိသုခ ကျောင်းတော်ကြီးကို မဟန က တာဝန်ပေးထားတဲ့ စည်းကမ်းထိမ်းသိမ်းရေး သံဃာတွေနဲ့ ရဲတွေက ညကြီး အချိန်မတော် ၀င်ရောက်စီးနင်း၊ သီတင်းသုံးနေတဲ့ သံဃာတော်တွေကို ဖမ်းဆီးခေါ်ဆောင်၊ ငါးပါးကို အတင်းအကြပ် လူဝတ်လဲ၊ အင်းစိန်ထောင်ပို့တာ ဖြစ်ခဲ့ပြီးနောက် သာသနာရေးဝန် ၀န်ကြီး ဦးဆန်းဆင့်ကို ရာထူးကနေ ဖြုတ်ချပြီး အာဏာပိုင်တွေက ဖမ်းဆီးထိန်းသိမ်းလိုက်ပါတယ်။ ကနဦး သတင်းတွေအရ ဦးဆန်းဆင့်ကို ကျပ်ငွေ သိန်း ၁၀၀ လောက်နဲ့ ညီမျှတဲ့ အစိုးရပိုင် ငွေတွေကို မမှန်မကန် ကိုယ်ကျိုးလုပ်တယ် ဆိုပြီး စသုံးလုံး အဖွဲ့က အမှုဖွင့်ထားတယ်လို့ ဆိုပါတယ်။ နောက်ပိုင်း သမ္မတ ပြောခွင့်ရ ပြန်ကြားရေး ဒုဝန်ကြီး ဦးရဲထွဋ်က ဦးဆန်းဆင့်ကို အရေးယူတာ အဲဒီ ပြစ်မှုတွေတင်မကဘူး၊ အစိုးရအဖွဲ့ ခေါင်းဆောင် သမ္မတ ရဲ့ ညွှန်ကြားချက်ကို မနာခံလို့ ခုလို အရေးယူရတာပါ ဆိုပြီး ပြောပါတယ်။ ကောင်းပါပြီ။ ၀န်ကြီး ဦးဆန်းဆင့် ဘာကြောင့် အရေးယူခံရသလဲ ဆိုတာ ဒီကနေ့ ဆွေးနွေးတင်ပြသွားပါမယ်။
ပထမ တစ်ချက်ကတော့ ဦးဆန်းဆင့်ကို ကျပ်ငွေ သိန်း ၁၀၀ လောက်ရှိတဲ့ အစိုရပိုင်ငွေ အလွဲသုံးစား လုပ်မှုနဲ့ အရေးယူ ဖမ်းဆီး အမှုဖွင့်ထားတယ် ဆိုတဲ့ ကိစ္စပါ။ ဒါ သဘာဝ မကျပါဘူး။ ဦးဆန်းဆင့်ဟာ အခြား အခြားသော ဗိုလ်ချုပ်ဟောင်းတွေလိုပဲ ချမ်းသာသူ တစ်ယောက်ပါ။ ဗိုလ်ချုပ်တွေကို နေရာချထားပေးတဲ့ ကမ္ဘာအေး ဗီလာလို နေရာမျိုးမှာလည်း ကိုယ်ပိုင်ခြံနဲ့ တိုက်နဲ့ ရှိပါတယ်။ ဆင်းဆင်းရဲရဲ ချို့ချို့ငဲ့ငဲ့ ဆိုရင်တောင် ကျပ်ငွေ သိန်းပေါင်း သောင်းချီပြီး အေးအေးဆေးဆေး ပိုင်ဆိုင်ပါတယ်။ သိန်း ၁၀၀ လောက် အဂတိ လိုက်စားမှာ မဟုတ်ပါဘူး။ နောက် စ သုံးလုံးက ပြောတာ အဲဒီငွေ ခိုးတာလည်း မဟုတ်ပါဘူး။ ဘုရား မှာ လှူဒါန်းတဲ့ငွေပါ။ ပြောရရင် ဦးဆန်းဆင့်ကို ငွေကြေး အလွဲသုံးစားလုပ်လို့ ဖမ်းရတာ ဆိုရင် မမှန်ပါဘူး။
နောက်တစ်ခု လက်ရှိ ဖြစ်ခဲ့တဲ့ မဟာသန္တိသုခ ကျောင်း ၀င်ရောက်စီးနင်းမှုနဲ့ ဆိုင်သလား ဆိုတာပါ။ သမ္မတ အကြံပေး ဦးရဲထွဋ်ကတော့ ဒီ ကိစ္စ ပါတယ်လို့ ဆိုပါတယ်။ “သန္တိသုခ ကိစ္စကလည်း အကြောင်းတစ်ခုပါဝင်ပါတယ်။ သန္တိသုခဖြစ်တဲ့ အချိန်ကစပြီး သမ္မတကြီးက ၀န်ကြီးအနေနဲ့ ဒီကိစ္စမှာ သံဃနာယက အဖွဲ့ရဲ့ ဆုံးဖြတ်ချက်ကိုလည်း အေးအေးချမ်းချမ်း အကောင်အထည်ဖော်နိုင်အောင်၊ ဟိုဘက်ဒီဘက် နှစ်ဖက်အကြားမှာ ၀န်ကြီးအနေနဲ့ရော ဆရာ ဒကာတွေ အနေနဲ့ရော ၀င်ရောက်ဆောင်ရွက်ဖို့ တာဝန်ပေးခဲ့တယ်” လို့ ဦးရဲထွဋ်က ပြောပါတယ်။ လက်ရှိ ဖြစ်ပွားခဲ့တဲ့ ပြသနာကို ပြန်ကြည့်ရင် မဟာသန္တိသုခ ကျောင်းတိုက် ၀င်စီးတဲ့ ကိစ္စမှာ နိုင်ငံတော် သံဃာ့မဟာနာယက လို့ခေါ်တဲ့ မဟန၊ ရန်ကုန်တိုင်း မဟန၊ သာသနာရေးဝန်ကြီးဌာန၊ ရန်ကုန်တိုင်း အစိုးရ၊ ပြည်ထဲရေးဝန်ကြီးဌာန အားလုံး ပါဝင် ပါတ်သက်နေပါတယ်။ ဒီနေရာမှာ သာသနာရေးဝန်ကြီး ဦးဆန်းဆင့်ဟာ ကြဇာကြီးတဲ့ ရန်ကုန်တိုင်းဝန်ကြီး ဦးမြင့်ဆွေ ကိုကျော်ပြီး ညွှန်ကြားလို့ ရမရ၊ ပြည်ထဲရေးကို ကျော်ပြီး ရဲတပ်ဖွဲ့ ပါလာအောင် လုပ်လို့ရမရ မေးခွန်းထုတ်စရာ ရှိပါတယ်။ တကယ်လို့ ဦးဆန်းဆင့်ကို အရေးယူရတာ မဟာသန္တိသုခ ကိစ္စဆိုရင် အစိုးရတာဝန်ရှိသူတွေ ဒီ ပြသနာ အစ အဆုံး ပြည်သူတွေကို ရှင်းဖို့၊ လင်းဖို့ တာဝန်ရှိပါတယ်။ ဦးဆန်းဆင့် တစ်ယောက်တည်း အပေါ် ပုံချတာကတော့ သိပ် ယုတ္တိ မတန်ပါဘူး။
နောက် အရေးကြီးတာ တစ်ချက် ဦးရဲထွဋ်ပြောတာ ဦးဆန်းဆင့်ဟာ သမ္မတ ပေးခဲ့တဲ့ တာဝန်ကျေပွန်အောင် မထမ်းဆောင်ဘူး၊ ဒီလို စကားနားမထောင်တဲ့အတွက် အကြိမ်ကြိမ် ပြောဆို ဆုံးမ ပဲ့ပြင်မှုတွေ ရှိခဲ့တဲ့အကြောင်း၊ အခု နောက်ဆုံးအကြိမ်မို့လို့ အရေးယူလိုက်ရတာလို့ ဆိုပါတယ်။ ခြုံပြောရရင် အစိုးရအဖွဲ့ရဲ့ လမ်းညွှန်ချက် မခံယူလို့ပါ။ ဒါဆိုရင်လည်း ဒီ ပုဒ်မနဲ့ပဲ အရေးယူ၊ သမ္မတ က ဦးဆန်းဆင့်ကို ဘာတွေ ညွှန်ကြားခဲ့ပြီး ဦးဆန်းဆင့်က ဘာတွေ မလိုက်နာခဲ့သလဲ၊ ဘာတွေ ဆန့်ကျင်ပြီး လုပ်ခဲ့သလဲ- အများပြည်သူသိအောင် ပွင့်ပွင့်လင်းလင်း ထုတ်ပြန်ပေးဖို့ လိုပါတယ်။
အခြားတစ်ဖက်မှာ ကြည့်လိုက်ရင် ဦးဆန်းဆင့်ဟာ အပြောင်းအလဲကာလ ဧရာဝတီ တိုင်းရဲ့ လွှတ်တော် ဥက္ကဌ ဖြစ်ခဲ့ပါတယ်။ လွှတ်တော်ဥက္ကဌ တာဝန်ယူစဉ် စ သုံးလုံးတွေက ခုလိုပဲ လိုက်ပါနှောင့်ယှက် ကလေးကလားလို လုပ်နေတာတွေကြောင့် အစိုးရအဖွဲ့ကို ပစ်တင်ရှုတ်ချ လုပ်ခဲ့သူပါ။ ပြည်နယ်၊ တိုင်း လွှတ်တော် (၁၄) ခု ရှိတဲ့အနက် အရင် အာဏာရှင်တွေ ချမှတ်ပေးသွားတဲ့ လက်ညှိုးထောင် ခေါင်းညှိမ့်၊ အတည်ပြုစရာ လိုမှ လွှတ်တော်ခေါ် ဆိုတဲ့ လမ်းစဉ် မလိုက်နာပဲ လွှတ်တော် တကယ် အသက်ဝင်လာအောင် လုပ်ခဲ့တဲ့ တစ်ဦးတည်းသော လွှတ်တော် ဥက္ကဌ လည်းဖြစ်ခဲ့ပါတယ်။ ပြည်ခိုင်ဖြိုး ဖြစ်ပေမယ့် ဦးဆန်းဆင့်ကိုတော့ ဒေသခံတွေရော၊ လွှတ်တော်ထဲက အမတ်တွေကပါ ထောက်ခံကြပါတယ်။
အဲဒီအချိန် သမ္မတ ဦးသိန်းစိန်က အလွန်အားထားရတဲ့၊ လက်ရှိလည်း သမ္မတ ဦးသိန်းစိန်ဟာ ပြည်ခိုင်ဖြိုးပါတီ ဥက္ကဌ ဖြစ်တယ်၊ သမ္မတနဲ့ ပါတီကို ထောက်ခံအားပေးရမယ် ဆိုပြီး တရားဝင် အစည်းအဝေးပွဲကြီးတွေမှာ ဗြောင် ထုတ်ဖော်ပြောဆိုရဲတဲ့ တိုင်းဝန်ကြီးချုပ် ဦးသိန်းအောင်ကို ဥပဒေကြောင်းအရ ဖြုတ်ချဖို့ ကြိုးစားခဲ့သူ ဖြစ်ပါတယ်။ ပြည်ခိုင်ဖြိုး ဒုဥက္ကဌ ဦးဌေးဦးလို လူကတောင် ကိုင်တွယ်လို့ မရသူ ဖြစ်ခဲ့ပါတယ်။ ဒါတင်မက လွှတ်တော် ဥက္ကဌ ဖြစ်နေတာကလည်း အဲဒီအချိန် သူ့ကို ပြည်ခိုင်ဖြိုးပါတီကရော၊ အစိုးရကပါ ဘယ်လိုမှ အရေးယူလို့ မရတဲ့ အခြေအနေမျိုး ဖြစ်ခဲ့တာပါ။ နောက်တော့ သိကြတဲ့အတိုင်း သူ့ကို သမ္မတ ဦးသိန်းစိန် လက်အောက် သာသနာရေးဝန်ကြီး တာဝန်ပေးပြီး ငြိမ်သက်အောင် ထိန်းထားလိုက်တာ ဖြစ်ပါတယ်။
အတွင်းသတင်းတွေအရတော့ ဦးဆန်းဆင့်ဟာ လွှတ်တော်နာယကကြီး သူရဦးရွှေမန်းရဲ့ လူဖြစ်တယ်၊ နိုင်ငံရေးမဟာမိတ် ဖြစ်တယ်ဆိုပြီးလည်း ပြောဆိုကြပါတယ်။ ဘယ်လောက် မှန်သလဲ အတည်ပြုလို့တော့ မရပါဘူး။ ဒါပေမယ့် ဦးဆန်းဆင့်ကို သမ္မတ ဦးသိန်းစိန် လက်အောက် သာသနာရေးဝန်ကြီး တာဝန်ပေးလိုက်ချိန် ဒီလို အဖြစ်မျိုး ဖြစ်လာနိုင်မယ် တွက်ခဲ့ပေမယ့် ဒီလောက် ဆိုးရွားတဲ့ ကံကြမ္မာ ကြုံလာလိမ့်မယ်လို့တော့ မျှော်လင့်ခဲ့ပုံ မရပါဘူး။ ရှေ့ပိုင်းမှာ ဖြစ်ခဲ့တဲ့ စာရင်းစစ်ချုပ် ဗိုလ်ချုပ်လွန်းမောင် ပြုတ်တဲ့ ကိစ္စ၊ ဖွဲ့စည်းပုံ ခုံရုံး ဥက္ကဌ ဦးသိန်းစိုး ပြုတ်တဲ့ကိစ္စတွေကို ပြန်ကြည့်လိုက်ရင် သမ္မတ ဦးသိန်းစိန် ဘက်က လူတွေဖြစ်နေတာကြောင့် ဆိုပြီးလည်း သုံးသပ်ကြပါတယ်။ မှန်ပါတယ်။ အဲဒီ လူတွေရော၊ အခု ဦးဆန်းဆင့်ပါ ဒီမိုကရေစီ ဘက်တော်သားတွေ မဟုတ်ပါဘူး၊ နိုင်ငံတော်ကို တော်လှန် ပုန်ကန်မယ့်သူတွေ မဟုတ်ပါဘူး၊ အဂတိလိုက်စားသူတွေလို့လည်း မသတ်မှတ်နိုင်ပါဘူး။ အဖြစ်နိုင်ဆုံးကတော့ ၂၀၁၅ နီးလာလေ၊ ပိုပြင်းထန်လာလေ ဖြစ်နေတဲ့ သမ္မတ ဦးသိန်းစိန်နဲ့ စစ်တပ်က တစ်ဖက်၊ လွှတ်တော်နာယက သူရဦးရွှေမန်းတို့က တစ်ဖက် ဖြစ်ပွားကြတဲ့ ဂိုဏ်းဂဏ တိုက်ပွဲမှာ ကျဆုံးကြရရှာသူတွေပဲလို့ ပြောရင် မှားနိုင်မယ် မထင်ပါကြောင်း သုံးသပ် တင်ပြလိုက်ရပါတယ်။
စည်သူအောင်မြင့်။
Inga kommentarer:
Skicka en kommentar